ލިޔުންތައް

• ICOM-A-2024-54 - Report -1740989110485.pdf

މައުލޫމާތު ހޯދުމަށް އެދި މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރއަށް ހުށަހަޅާފައިވާ ހުށަހެޅުމުގައި ވަނީ ތިރީގައި ބަޔާންކޮށްފައިވާ ފަދައިންނެވެ:

'ތިލަމާލެ ބްރިޖްގެ ޕްރޮޖެކްޓްގެ އިނިޝިއަލް ޕްރޮޖެކްޓް ޓައިމްލައިނާއި، އޭގެ ފަހުން ޕްރޮޖެކްޓް ޓައިމްލައިނަށް ގެނެވުނު ހުރިހާ ބަދަލެއްގެ ކޮޕީތައް، އޭގެ ތެރޭގައި، އެބަދަލުތައް ބަދަލުކުރި ތާރީޚުތަކާއި، ޕްރޮޖެކްޓް ޓައިމްލައިނަށް ބަދަލު ގެންނަން ޖެހުނު ސަބަބާއި މީގެ އިތުރުން ޕްރޮޖެކްޓް ޓައިމްލައިން ޑޮކިއުމަންޓްގެ ކޮޕީތަށް، އޭގެ ތެރޭގައި ގާންޓް ޗާޓާއި މައިކްރޮސޮފްޓް ޕްރޮޖެކްޓްސް ފައިލްސް، އެކްސެލް ޝީޓް ނުވަތަ ޕީޑީއެފް ފައިލް އަދި މީގެ އިތުރުން މި ޕްރޮޖެކްޓުގެ އެސް-ކާވް ހޯދުމަށް'

މައްސަލަ ބަލައި ނިންމި ގޮތް

މަތީގައި ހަވާލާދެވިފައިވާ އިލާތިމާސްއާ ގުޅިގެން ހުށަހަޅާފައިވާ ލިޔެކިޔުންތަކާއި އިލްތިމާސް ބެލުމަށްޓަކައި ބޭއްވުނު ބައްދަލުވުމުގައި ފާހަގަކުރެވުނު ކަންކަމަށް ރިޢާޔަތްކުރުމުން، ހޯދަން އެދިފައިވާ މައުލޫމާތުގެ ތެރެއިން އެސް.ކަރވްއަކީ މިނިސްޓްރީން ގެންގުޅެ ބަލަހައްޓާ މައުލޫމާތެއް ނޫން ކަމަށާއި، މިއީ ޕްރޮޖެކްޓްގެ ކޮންޓްރެކްޓަރ ގެންގުޅޭ ޑޮކިއުމަންޓެއް ކަމުގައި 06 ޖަނަވަރީ 2025 ގައި ބޭއްވުނު ހުޅުވާލެވިފައިވާ ބައްދަލުވުމުގައްޔާއި 21 ޖަނަވަރީ 2025 ގައި މިނިސްޓްރީން ދީފައިވާ ޖަވާބުގައި ބުނެފައިވީ ނަމަވެސް، މި މައުލޫމާތަކީ އިދާރާގައި ހުރި މައުލޫމާތެއްކަން ނުވަތަ ނޫންކަން އިދާރާގެ އިންފޮމޭޝަން އޮފިސަރު އަދި މުރާޖާ ކޮމެޓީން ވެސް ދީފައިވާ ޖަވާބުގައި ބަޔާންކޮށްފައިނުވުމާއެކު، ޤާނޫނުގެ 12 ވަނަ މާއްދާގައި ބަޔާންކޮށްފައިވާ އިޖުރާއަތުތައް މިނިސްޓްރީން ފުރިހަމަކޮށްފައިނުވާކަމަށް ކަނޑައަޅަމެވެ.

އަދި ހޯދުމަށް އެދިފައިވާ މައުލޫމާތުގެ ތެރެއިން ގާންޓް ޗާޓަކީ މިނިސްޓްރީ އޮފް ކޮންސްޓްރަކްޝަން، ހައުސިންގ އެނޑް އިންފްރާސްޓްރަކްޗަރގައި ގެންގުޅެ ބަލަހައްޓާ މައުލޫމާތު ކަމަށް ވެފައި، މިއީ މައުލޫމާތު ހޯދައި ލިބިގަތުމުގެ ހައްގުގެ ޤާނޫނުގެ އެއްވެސް މާއްދާއެއްގެ ދަށުން ދޫކުރުން އިސްތިސްނާކުރެވިފައިވާ މައުލޫމާތެއް ކަމުގައި ނުބެލެވޭތީ، އެދިފައިވާ މައުލޫމާތު ހުށަހެޅި ފަރާތުން އެދިފައިވާ ފޯމެޓަށް ދޫކުރަންޖެހޭނެ ކަމަށް ކަނޑައަޅައި، އެ މައުލޫމާތު ރަސްމީ 7 (ހަތެއް) ދުވަހުގެ ތެރޭގައި ހުށަހެޅި ފަރާތަށް ދޫކުރުމަށް އަންގައި މި އިލްތިމާސް ނިންމައިފީމެވެ.

ލިޔުންތައް

• ICOM-A-2024-56 Report-1738638885356.pdf

2021 ވަނަ އަހަރު ކޮވިޑް ވެކްސިން ޖަހަން ބޭނުންވި މުވައްޒަފުން ވަޒީފާއަށް ނުކުތުމުގައި ޕީ.ސީ.އާރު ޓެސްޓް ހުށަހެޅި މުވައްޒަފުންގެ އަދަދާއި 2021 ވަނަ އަހަރުން ފެށިގެން މިއަދާ ހަމައަށް މަރުވެފައިވާ މުވައްޒަފުންގެ މަޢުލޫމާތު (އުމުރު، ޖިންސު، މަރުވި ތާރީޚު އަދި ކޮވިޑް ވެކްސިން ޖަހާފައިވޭތޯ) ހޯދުމަށް އެދި ހުށަހަޅާފައިވެއެވެ. ހޯދުމަށް އެދިފައިވާ 2021 ވަނަ އަހަރު ކޮވިޑް ވެކްސިން ޖަހަން ބޭނުންވި މުވައްޒަފުން ވަޒީފާއަށް ނުކުތުމުގައި ޕީ.ސީ.އާރު. ޓެސްޓް ހުށަހެޅި އެއްވެސް މުވައްޒަފެއް ނެތްކަމަށް އިދާރާއިން ސާފުކޮށްދީފައިވާތީއާއި މުރާޖާ ކޮމެޓީން ދީފައިވާ ޖަވާބުން އެނގެން އޮތަތީ މި މަޢުލޫމާތު ފޯރުކޮށްދީފައިވާކަމަށް ކަނޑައަޅާފައިވެއެވެ.

މީގެ އިތުރުން، މަރުވެފައިވާ މުވައްޒަފުންގެ އުމުރު، ޖިންސު، މަރުވި ތާރީޚު އަދި ކޮވިޑް ވެކްސިން ޖަހާފައިވޭތޯ މި މަޢުލޫމާތަކީ ތިންވަނަ ފަރާތެއްގެ ޒާތީ މަޢުލޫމާތެއްކަމަށް ރައްދުވާ އިދާރާގެ އިންފޮމޭޝަން އޮފިސަރު އަދި މުރާޖާ ކޮމެޓީގެ ޖަވާބުންނާއި މި އިލްތިމާސްއާ ގުޅިގެން ބޭއްވުނު ބައްދަލުވުމުގައި ފާހަގަކޮށްފައިވެއެވެ. އެހެންނަމަވެސް، މި މަޢުލޫމާތަކީ ޤާނޫނުގައި ބަޔާންކުރާފަދަ ތިންވަނަ ފަރާތެއްގެ ޒާތީ މަޢުލޫމާތެއްކަމަށް ނުބެލެވޭތީ މި މަޢުލޫމާތު ހުށަހެޅި ފަރާތަށް ދޫކުރުމަށް އަންގައި މި އިލްތިމާސް ނިންމާފައިވެއެވެ.

މައްސަލަ ބަލައި ނިންމި ގޮތް

ހަވާލާދެވިފައިވާ އިލްތިމާސްއާ ގުޅިގެން ހުށަހަޅާފައިވާ ލިޔެކިޔުންތަކާއި ބޭއްވުނު ބައްދަލުވުމުގައި ފާހަގަކުރެވުނު ކަންކަމަށް ރިޢާޔަތްކުރުމުން، 6.1 ވަނަ ނުކުތާގައި ހޯދުމަށް އެދިފައިވާ 2021 ވަނަ އަހަރު ކޮވިޑް ވެކްސިން ޖަހަން ބޭނުންވި މުވައްޒަފުން ވަޒީފާއަށް ނުކުތުމުގައި ޕީ.ސީ.އާރު. ޓެސްޓް ހުށަހެޅި އެއްވެސް މުވައްޒަފެއް ނެތްކަމަށް އިދާރާއިން ސާފުކޮށްދީފައިވާތީއާއި މުރާޖާ ކޮމެޓީން ދީފައިވާ ޖަވާބުން އެނގެން އޮތަތީ ބުނެވުނު މައުލޫމާތު ފޯރުކޮށްދީފައިވާކަމަށް ކަނޑައަޅަމެވެ.

މީގެ އިތުރުން، 6.2 ވަނަ ނުކުތާގައި އެދިފައިވާ 2021 ވަނަ އަހަރުން ފެށިގެން މަޢުލޫމާތަށް އެދި ހުށަހެޅި ތާރީހާ ހަމައަށް މަރުވެފައިވާ މުވައްޒަފުންގެ އުމުރާއި، ޖިންސާއި، މަރުވި ތާރީހަކީ ޤާނޫނު ނަންބަރު 2014/1 (މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނު)ގެ 23 ވަނަ މާއްދާ (ތިންވަނަ ފަރާތެއްގެ ޒާތީ މަޢުލޫމާތު) ގެ ދަށުން ދޫނުކޮށް ހިފެހެއްޓޭނެ މަޢުލޫމާތެއް ނޫންކަމަށް ކަނޑައަޅައި މި މަޢުލޫމާތު ރަސްމީ 5 (ފަހެއް) ދުވަހުގެ ތެރޭގައި ހުށަހެޅި ފަރާތަށް ދޫކުރުމަށް އަންގައި މި އިލްތިމާސް ނިންމައިފީމެވެ.

ލިޔުންތައް

• ICOM-C-2024-464 Report-1737871018615.pdf

އިގުތިސާދު ރިފޯމް އެޖެންޑާގެ ދަށުން ރައީސުލްޖުމްހޫރިއްޔާ ވަކިކުރަން ނިންމާފައިވާ މުވައްޒަފުންގެ މަޢުލޫމާތު ހޯދުމަށް އެދި ރައީސުލްޖުމްހޫރިއްޔާގެ އޮފީހަށް ހުށަހެޅުމެއް ހުށަހަޅާފައި ވެއެވެ. މި މައުލޫމާތަކީ ތިންވަނަ ފަރާތެއްގެ ޒާތީ މައުލޫމާތު ކަމަށް ފާހަގަކޮށް މި މައުލޫމާތު ދޫނުކުރުމަށް ރައީސުލަޖުމްހޫރިއްޔާގެ އޮފީހުން ވަނީ ކަނޑައަޅާފައެވެ. އެހެން ނަމަވެސް ހޯދަން އެދިފައިވާ މަޢުލޫމާތުގެ ތެރެއިން މަގާމުތަކުން ވަކިކުރަން ނިންމާފައިވާ ފަރާތްތަކުގެ އެޑްރެސް ފިޔަވައި ދެންހުރި މައުލޫމާތަކީ އެ މައުލޫމާތެއް ހާމަނުކުރުމުން ރައްކާތެރިކުރެވޭ މަސްލަހަތަށްވުރެ އެ މައުލޫމާތު ހާމަކުރުމުން ރައްކާތެރިކުރެވޭ މަސްލަހަތު ބޮޑު މައުލޫމާތަކަށްވާތީ އެ މައުލޫމާތު ދޫކުރުމަށް ރައީސުލްޖުމްހޫރިއްޔާގެ އޮފީހަށް އެންގުނެވެ.

މައްސަލަ ބަލައި ނިންމި ގޮތް

މި ޝަކުވާއާ ގުޅިގެން މި އޮފީހަށް ހުށަހަޅާފައިވާ ލިޔެކިޔުންތަކާއި ބޭއްވުނު ބައްދަލުވުމުގައި ފާހަގަކުރެވުނު ކަންކަމަށް ރިއާޔަތްކުރުމަށް ފަހު، ހޯދުމަށް އެދިފައިވާ މަޢުލޫމާތުގެ ތެރެއިން ވަކިކުރުމަށް ނިންމާފައިވާ މުވައްޒަފުންގެ އެޑްރެސްއަކީ ޤާނޫނު ނަންބަރު 2014/1 (މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނު) ގެ 23 ވަނަ މާއްދާގެ ދަށުން ދޫނުކޮށް ހިފެހެއްޓޭނެ މަޢުލޫމާތެއް ކަމުގައި ކަނޑައަޅަމެވެ.

މީގެ އިތުރުން، ޤާނޫނު ނަންބަރު 2014/1 (މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނު) ގެ 23 ވަނަ މާއްދާގެ ދަށުން ސިޔާސީ މުވައްޒަފުންގެ ނަމާއި، މަޤާމާއި، ވަޒީފާއަދާކުރަމުންއައި ތަނާއި އެފަރާތްތަކުގެ މުސާރައަކީ ޒާތީ މަޢުލޫމާތުކަމަށް އިދާރާއިން ފާހަގަކުރިކަމުގައިވީނަމަވެސް، އެ ޤާނޫނުގެ 20 ވަނަ މާއްދާގެ (ހ) ގެ އަލީގައި ހޯދުމަށް އެދިފައިވާ މަޢުލޫމާތު ދިނުމަކީ މުޅި ރައްޔިތުންގެ މަސްލަހަތު މާ ރަނގަޅަށް ހާސިލުވާނެ ކަމެއް ކަމުގައި، އަދި އެ މަޢުލޫމާތު ހާމަނުކުރުމުން ރައްކާތެރިކުރެވޭ މަސްލަހަތަށްވުރެ އެ މައުލޫމާތު ހާމަކުރުމުން ރާއްކާތެރިކުރެވޭ މަސްލަހަތު ބޮޑުކަމަށް ކަނޑައަޅައި، އެ މައުލޫމާތު ރަސްމީ 5 (ފަސް) ދުވަހުގެ ތެރޭގައި މަޢުލޫމާތު ހޯދުމަށް އެދި ހުށަހެޅި ފަރާތަށް ދޫކުރުމަށް އަންގައި މި ޝަކުވާ ނިންމައިފީމެވެ.

ލިޔުންތައް

• ICOM-C-2024-476 Report-1737870725459.pdf

އިގުތިސާދީ އިސްލާހީ ފިޔަވަޅުތަކުގެ ދަށުން، 228 ސިޔާސީ ބޭފުޅުން މަޤާމުތަކުން ވަކިކުރަން އަންގާފައިވާކަމަށް ރައީސުލްޖުމްހޫރިއްޔާ ވިދާޅުވެފައިވާތީ އެ ފަރާތްތަކުގެ ތަފުސީލު ހޯދުމަށް އެދި ރައީސުލްޖުމްހޫރިއްޔާގެ އޮފީހަށް ހުށަހެޅުމެއް ހުށަހަޅާފައި ވެއެވެ. މި ހުށަހެޅުމުގައި އެދިފައިވާ މަޢުލޫމާތުގެ ތެރެއިން އައްޔަނުކޮށްފައިވާ ފަރާތްތަކުގެ އެޑްރެސްއަކީ ޒާތީ މަޢުލޫމާތެއް ކަމަށް ކަނޑައެޅުނެވެ. އެހެންނަމަވެސް، ހޯދުމަށް އެދިފައިވާ ވަކިކުރެވުނު ފަރާތްތަކުގެ ނަން، ވަކިކުރެވުނު ތާރީޚު އަދި ވަޒީފާ އަދާކުރަމުން އައި ވުޒާރާ މި މަޢުލޫމާތަކީ އާންމު މަސްލަހަތަށް ރިޢާއަތްކުރާއިރު، ޤާނޫނުގެ ދަށުން ނުދީ ހިފެހެއްޓޭނެ މަޢުލޫމާތެއް ނޫންކަމުގައި ކަނޑައަޅައި އެ މަޢުލޫމާތު ހުށަހެޅި ފަރާތަށް ދޫކުރުމަށް އަންގާފައި ވެއެވެ.

މައްސަލަ ބަލައި ނިންމި ގޮތް

މި ޝަކުވާއާ ގުޅިގެން މި އޮފީހަށް ހުށަހަޅާފައިވާ ލިޔެކިޔުންތަކާއި ބޭއްވުނު ބައްދަލުވުމުގައި ފާހަގަކުރެވުނު ކަންކަމަށް ރިއާޔަތްކުރުމަށް ފަހު، ހޯދުމަށް އެދިފައިވާ މަޢުލޫމާތުގެ ތެރެއިން އިގުތިސާދީ އިސްލާހީ ފިޔަވަޅުތަކުގެ ދަށުން، 228 ސިޔާސީ ބޭފުޅުން މަޤާމުތަކުން ވަކިކުރަން ނިންމާފައިވާ ފަރާތްތަކުގެ އެޑްރެސްއަކީ ޤާނޫނު ނަންބަރު: 2014/1 (މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނު)ގެ 23 ވަނަ މާއްދާގެ ދަށުން ޒާތީ މަޢުލޫމާތެއްކަމަށް ކަނޑައަޅަމެވެ.

މީގެ އިތުރުން، ޤާނޫނު ނަންބަރު 2014/1 (މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނު) ގެ 23 ވަނަ މާއްދާގެ ދަށުން ސިޔާސީ މުވައްޒަފުންގެ ނަމާއި، މަޤާމާއި، ވަޒީފާއަދާކުރަމުން އައި ތަނާއި އަދި ވާޒީފާއިން ވަކިކުރި ތާރީޚަކީ ޒާތީ މަޢުލޫމާތުކަމަށް އިދާރާއިން ފާހަގަކުރިކަމުގައިވީނަމަވެސް، އެ ޤާނޫނުގެ 20 ވަނަ މާއްދާގެ (ހ) ގެ އަލީގައި ހޯދުމަށް އެދިފައިވާ މަޢުލޫމާތު ދިނުމަކީ މުޅި ރައްޔިތުންގެ މަސްލަހަތު މާ ރަނގަޅަށް ހާސިލުވާނެ ކަމެއް ކަމުގައި، އަދި އެ މަޢުލޫމާތު ހާމަނުކުރުމުން ރައްކާތެރިކުރެވޭ މަސްލަހަތަށްވުރެ އެ މައުލޫމާތު ހާމަކުރުމުން ރާއްކާތެރިކުރެވޭ މަސްލަހަތު ބޮޑުކަމަށް ކަނޑައަޅައި، އެ މައުލޫމާތު ރަސްމީ 5 (ފަސް) ދުވަހުގެ ތެރޭގައި މަޢުލޫމާތު ހޯދުމަށް އެދި ހުށަހެޅި ފަރާތަށް ދޫކުރުމަށް އަންގައި މި ޝަކުވާ ނިންމައިފީމެވެ.

ލިޔުންތައް

• President's Office (ICOM-C-2024-457)- Report-1740024388785.pdf

އިގުތިސާދީ އިސްލާހީ ފިޔަވަޅުތަކުގެ ދަށުން، 228 ސިޔާސީ ފަރާތްތަކުގެ މަޤާމުތަކުން ވަކިކުރަން އަންގާފައިވާކަމަށް ރައީސުލްޖުމްހޫރިއްޔާ ބުނެފައިވާތީ އެ ފަރާތްތަކުގެ ތަފުސީލު ހޯދުމަށް އެދި ރައީސުލްޖުމްހޫރިއްޔާގެ އޮފީހަށް ހުށަހެޅުމެއް ހުށަހަޅާފައި ވެއެވެ. މި ހުށަހެޅުމުގައި އެދިފައިވާ މަޢުލޫމާތަކީ އާންމު މަސްލަހަތަށް ރިޢާއަތްކޮށް ޤާނޫނުގެ ދަށުން ނުދީ ހިފެހެއްޓޭނެ މަޢުލޫމާތެއް ނޫންކަމަށް ކަނޑައަޅައި އެ މަޢުލޫމާތު ހުށަހެޅި ފަރާތަށް ދޫކުރުމަށް އަންގާފައި ވެއެވެ.

މައްސަލަ ބަލައި ނިންމި ގޮތް

މި ޝަކުވާއާ ގުޅިގެން މި އޮފީހަށް ހުށަހަޅާފައިވާ ލިޔެކިޔުންތަކާއި ބޭއްވުނު ބައްދަލުވުމުގައި ފާހަގަކުރެވުނު ކަންކަމަށް ރިއާޔަތްކުރާއިރު، ޤާނޫނު ނަންބަރު 2014/1 (މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނު) ގެ 23 ވަނަ މާއްދާގެ ދަށުން ސިޔާސީ މުވައްޒަފުންގެ ނަމާއި، މަޤާމާއި، މުސާރައާއި ވަޒީފާއަދާކުރަމުން އައި ތަނަކީ ޒާތީ މަޢުލޫމާތުކަމަށް އިދާރާއިން ފާހަގަކުރިކަމުގައިވީނަމަވެސް، އެ ޤާނޫނުގެ 20 ވަނަ މާއްދާގެ (ހ) ގެ އަލީގައި ހޯދުމަށް އެދިފައިވާ މަޢުލޫމާތު ދިނުމަކީ މުޅި ރައްޔިތުންގެ މަސްލަހަތު މާ ރަނގަޅަށް ހާސިލުވާނެ ކަމެއް ކަމުގައި، އަދި އެ މަޢުލޫމާތު ހާމަނުކުރުމުން ރައްކާތެރިކުރެވޭ މަސްލަހަތަށްވުރެ އެ މައުލޫމާތު ހާމަކުރުމުން ރާއްކާތެރިކުރެވޭ މަސްލަހަތު ބޮޑުކަމަށް ކަނޑައަޅައި، ހޯދަން އެދުނު މައުލޫމާތު ރަސްމީ 5 (ފަހެއް) ދުވަހުގެ ތެރޭގައި މަޢުލޫމާތު ހޯދުމަށް އެދި ހުށަހެޅި ފަރާތަށް ދޫކުރުމަށް އަންގައި މި ޝަކުވާ ނިންމައިފީމެވެ.