 މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނުގެ ދަށުން ބޭއްވުމަށް ތާވަލުކުރެވުނު ބައްދަލުވުމަކަށް ހާޒިރުނުވުމުގެ ސަބަބުން މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް 350 ރުފިޔާއިން ޖޫރިމަނާކޮށްފިއެވެ.   
މި ޖޫރިމަނާ ކުރެވިފައިވަނީ ޤާނޫނު ނަންބަރު 2014/1 (މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނު)ގެ 67 ވަނަ މާއްދާގެ (ނ)ގެ 2 ގެ ދަށުންނެވެ. މިއީ ހައުސިންގ މިނިސްޓްރީގެ އިންފޮމޭޝަން އޮފިސަރު ދީފައިވާ ޖަވާބަކާ ގުޅިގެން ހުށަހެޅުނު އިލްތިމާސްއަކާ ގުޅޭގޮތުން ބޭއްވުމަށް ހަމަޖެހިފައިވާ ބައްދަލުވުމަކަށް އެ މިނިސްޓްރީގެ ފަރާތުން ހާޒިރުނުވުމުގެ ސަބަބުން ކުރެވުނު ޖޫރިމަނާއެކެވެ. 

މަޢުލޫމާތު ހޯދައި ލިބިގަތުމުގެ ޙައްޤުގެ ގަވާއިދުގެ 104 ވަނަ މާއްދާގައި ބަޔާންކޮށްފައިވާ ގޮތުން، މިފަދަ ބައްދަލުވުމަކަށް ހާޒިރުވުމަށް އަންގާ އެންގުމަށް މަޤުބޫލު ސަބަބެއް މެދުވެރިވެގެން ހާޒިރުވެވެން ނެތްނަމަ، ބައްދަލުވުން ފެށުމަށް ކަނޑައަޅާފައިވާ ގަޑީގެ މަދުވެގެން 1 ގަޑިއިރު ކުރިން އިންފޮމޭޝަން ކޮމިޝަނަރަށް އެކަން ސަބަބާއެކު އަންގަންޖެހެއެވެ. ނަމަވެސް، ހައުސިންގ މިނިސްޓްރީގެ އިންފޮމޭޝަން އޮފިސަރު މި ބައްދަލުވުމަށް ހާޒިރުނުވާނެކަން އައިކޮމްއަށް އަންގާފައެއް ނުވެއެވެ. އަދި   ބައްދަލުވުމުގައި ބައިވެރިނުވާތީ، ކަން ހިނގި ގޮތް ސާފުކުރުމަށް އެ މިނިސްޓްރީއަށް  ގުޅަން މަސައްކަތްކުރުމުން ފޯނަށް ޖަވާބު ދީފައެއްވެސް ނުވެއެވެ.  

Ministry of Housing, Land and Urban Development fined by ICOM