މުއާމަލާތް ކުރުމާއި އިހުތިރާމު ކުރުމާ ގުޅޭ ގޮތުން މައުލޫމާތު ދިނުމުގެ ބައްދަލުވުމެއް ބާއްވައިފި
މުއާމަލާތް ކުރުމާއި އިހުތިރާމު ކުރުމާ ގުޅޭގޮތުން އައިކޮމްގެ މައުލޫމާތު ދިނުމުގެ ބައްދަލުވުމެއް ބާއްވައިފިއެވެ.
އައިކޮމްގެ ހުދުހުދު މާލަމުގައި މިއަދު ކުރިއަށް ގެންދިޔަ މި ބައްދަލުވުމުގައި މައުލޫމާތު ދެއްވީ ޑިރެކްޓަރ ޖެނެރަލް އަލްފާޟިލް އަޙްމަދު ޝިޔާމެވެ.
މި ބައްދަލުވުމުގައި މުއާމަލާތް ކުރުމާއި އިހްތިރާމުކުރުމުގެ އަދަބުތަކުގެ ތެރެއިން ވަޒީފާގެ މާހައުލާއި އާންމު ދިރިއުޅުމުގައި މީހުންނާ މުއާމަލާތްކުރުމުގައި ގެންގުޅޭނެ ރީތި އަދަބުތަކާއި، ވަޒީފާގެ މާހައުލުގައި އެހެން މުވައްޒަފުން ކަން ކުރާގޮތް ދެނެގަނެ އެކަން ކަމާމެދު އަބަދު ވެސް ފަހި ވިސްނުމެއް ގެންގުޅޭނެ ގޮތްތަކާއި، އޮފީހަކަށް ޚިދުމަތް ހޯދަން އަންނަ ފަރާތެއް ހިތްހަމަ ނުޖެހިއްޖެ ނަމަ އެ މީހަކާ މެދު އަމަލުކުރަންވީ ގޮތްތަކާ ގުޅޭ ގޮތުން ވެސް އަލިއަޅުއްވައިލެއްވިއެވެ.
މީގެ އިތުރުން މުއާމަލާތް ކުރުމުގެ ރީތި އަދަބުތަކާއި އެހެން މީހުންނަށް އިހުތިރާމު ކުރުމާ ގުޅޭ ގޮތުން ދުނިޔޭގެ މަޝްހޫރު ބައެއް ބޭފުޅުން ވިދާޅުވެފައިވާ ބަސްފުޅުތައް ޝިޔާމް ހިއްސާކުރެއްވިއެވެ. އަދި އިހުތިރާމު ކުރުމުގައި އެންމެ އިސްކަން ދެވޭ ކަންތައް ކަމަށް މުވައްޒަފުން ގަބޫލުކުރާ ކަންތައް ނަންބަރު ޖަހައިގެން ދަރަޖުކުރުމުގެ ހަރަކާތެއް ވެސް މި ބައްދަލުވުމުގައި ކުރިއަށް ގެންދިޔައެވެ.
މައުލޫމަތު ދިނުމުގެ މިފަދަ ބައްދަލުވުންތަކަކީ އައިކޮމްގެ މުވައްޒަފުންގެ ވިސްނުން ތާޒާކޮށް، މަސައްކަތް ކުރިއެރުވުމުގެ ޕްރޮގްރާމުގެ ތެރެއިން ކުރިއަށް ގެންދާ ބައްދަލުވުންތަކެކެވެ. މިއަދުގެ ބައްދަލުވުމުގައި އައިކޮމްގެ 12 މުވައްޒަފުން ބައިވެރިވެވަޑައިގެންނެވިއެވެ.